Hauptinhalt

Comunicać dal Ufize Stampa dla Provinzia

Politica | 21.11.2017 | 13:44

Viajé debann tl'Euregio, 250 agn Andreas Hofer, SASA inhouse

Ai 2 de dezëmber pón viajé debann da Kufstein cina Rorëi, la SASA devënta na sozieté inhouse y i 250 agn dala nasciüda de Hofer: chisc i temesc dla Junta.

En sabeda ai 2 de dezëmber, podarán jí cun le Südtirol Pass debann cun dötes les ferates locales y corieres dl’Euregio Tirol – Südtirol – Trentin. Al é na scomenciadia ponsada por düc i zitadins en ocajiun dl pröm De dla Mobilité tl’Euregio. “Tratan chësc de podará dötes les porsones viajé debann cun öna na cherta sön dötes les trasses dl’Euregio. Le fin dla scomenciadia é chël da anuzé les ofertes culturales ti raiuns vijins s’anuzan de mesi de trasport sostenibli”, dij le presidënt dla Provinzia Arno Kompatscher. Ai 2 de dezëmber podarán insciö vijité debann i marciá da nadé dl’Euregio zënza messëi rodé cun i mesi privac, insciö Kompatscher.

Sön proposta dl assessur por la mobilité Florian Mussner él gnü tut la dezijiun da istituí nia ma i 2 de dezëmber sciöche De dla Mobilité tl’Euregio, mo ince i 5 de setëmber (De dl’Autonomia). “Les trëi provinzies á na storia deboriada che vëgn ince trasmetüda tres l’Euregio – scomenciadies sciöche chëstes é insciö de importanza fondamentala por amplié la colaboraziun danter i raiuns y se conësce damí”, insciö l’assessur Mussner.

Ai 2 de dezëmber pón insciö anuzé le Südtirol Pass, le Südtirol Pass family, l’EuregioFamilyPass, le Südtirol Pass free, le Südtirol Pass abo+ y le Südtirol Pass 65+ te dötes trëi les regiuns zënza messëi paié le iade. Tl Tirol pón anuzé debann les corieres y les ferates dl “Verkehrsbund Tirol (VVT)” y di “Innsbrucker Verkehrsbetriebe” (IVB). Naturalmënter pón ince anuzé düc i mesi de trasport local dl Südtirol, les ferates regionales Prener-Trënt, Mals-Sanciana(Vierschach, les corieres locales, la furnadoia de Ritten, Jenesien, Kohlern, Vöran, Mölten y Meransen sciöche ince la ferata söl Ritten y che porta sön la Mendel. Tl Trentin podarán viajé debann tles corieres de Trënt, Rorëi, Riva del Garda, Arco, Nago Torbole, Pergine y Lavis, sciöche ince cun düc i sorvisc de “Trentino Trasporti Esercizio SpA”, dles ferates Trënt-Malé, Valsugana (danter Trënt y Primolano), di sorvisc dles ferates sön la linia dl Prener danter Borghetto y Mezzocorona y dla furnadoia Trënt – Sardagna.

Les chertes mëss gní timbrades sciöche tres tl Südtirol y sön les trates danter le Prener - Desproch y Sanciana – Lienz, al ne gnará indere nia trat jö scioldi, mo les trasses gnará aratades al cost de 0 euro. Al ne gnará gnanca calcolé lapró i chilometri. Chësc sorvisc vel ma por i passajiers, sce valgügn á para tiers o rodes, spo él nezesciar da cumpré na cherta regolara. Por de plü informaziuns: www.vvt.at (Tirol) www.sii.bz.it (Südtirol) www.ttesercizio.it (Trentin).

Sön proposta dl presidënt dla Provinzia Arno Kompatscher á la Junta provinziala aprové incö ai 21 de novëmber la cumpra de aziuns dla sozieté “SASA AG” por indöt 500.000 euro. “Cun chësc orunse sostigní formes inovatives y sostenibles dla mobilité por les linies urbanes tles cités y tles vijinanzes di majeri zëntri urbans dl Südtirol” á dit le presidënt dla Provinzia Kompatscher. I atri possessurs de aziuns dla “SASA AG” é i Comuns de Balsan, Maran y Laives. Chisc Comuns á bele dé löm vërda ala converjiun dla SASA te na sozieté daldöt inhouse. “Chësta é la condiziun prinzipala por regolamenté la surandada dles linies dles corieres tles cités tres na conzesciun direta en armonia cun les regolamentaziuns europeiches”, á splighé Kompatscher. “La basa iuridica de chësta dezijiun é la lege sön la mobilité nöia dl 2015”, ajunta l’assessur provinzial por la mobilité Florian Mussner. Le capital dla sozieté é de indöt 2,8 miliuns de euro y partí sö te 54.424 aziuns ordinares.

Le presidënt dla Provinzia Arno Kompatscher á ince recordé por l’ocajiun i 250 agn dala nasciüda de Andreas Hofer che gnará festejé indoman ai 22 de novëmber. Andreas Hofer é sté n combatënt storich por la liberté dl Tirol y che é sté a ce dl scombatüda cuntra l’ocupaziun dl Paiern y dla Francia de Napoleun tl ann 1809. Ince le presidënt dla Provinzia, Arno Kompatscher, recorda che le rode zentral dla figöra de Hofer por la storia locala: “I sacrifizi de Hofer é öna dles sbürles simboliches plü importantes devers dla liberté tl Tirol y en general por le dejider dla liberté de chësc popul.” Le presidënt á sotligné inant che les aziuns de Hofer “é n impuls ince aldedaincö dai punc de odüda soziai y politics ince por la Junta provinziala, recordan ince le dit conesciü de Hofer “Mander – ‘s isch Zeit!” sotlignëia l’importanza da ester cosciënc che vignun de nos á tres la poscibilité tles mans da ti dé la dërta direziun al dagní te na manira responsabla.”

(USP)

(Atualisà ai: 28/04/2011)