Hauptinhalt

Comunicać dal Ufize Stampa dla Provinzia

Scora / Cultura | 11.01.2018 | 12:16

Le program dla Teßmann ala mostra di libri Bücherwelten a Balsan

La Biblioteca Teßmann presentëia indô libri premiá dla leteratöra, publicaziuns nöies, le bar di media y tröp d’ater ala mostra di libri 2018 a Balsan.

Ince la biblioteca provinziala Teßmann sará ala mostra di libri "Bücherwelten 2018" a Balsan (Foto USP)Ince la biblioteca provinziala Teßmann sará ala mostra di libri "Bücherwelten 2018" a Balsan (Foto USP)

Ince en chësc ann se presentëia la Biblioteca provinziala indô cun  tröpes scomenciadies pro la mostra di libri “Bücherwelten” 2018 dal 17 de jená al 6 de forá tla Ciasa dla Cultura “Walther von der Vogelweider” a Balsan. Le scomenciadies sará desvalies.

Mediabar

Ara arjigna ite le bar di media: "Friedrich", le scagn multimedial mobil, inviëia da imparé a conësce audiolibri, films, documënc chiris fora y la biblioteca online Biblio24. Chësta oferta multimediala interessanta ti pîta ales porsones che vá a ti ciaré ai Monns di libri n azes daldöt nü ai materiai multimediai desvalis a desposiziun.

Operes premiades y coleziuns

Bele por le cuinto iade ti vëgnel presenté a che che vá a ti ciaré ala mostra di libri na cerna de libri che é gnüs premiá dl 2017 da iuries espertes y independëntes cun pesć desvalis: operes importantes dl'ert dl baié, dla mediaziun interessanta dl savëi y di valurs o scemplamënter ma operes plajores por dötes les porsones che lí ion. Chisc libri rovará spo tles biblioteches publiches dl Südtirol. An pó s'impresté fora düc i libri premiá tla Biblioteca provinziala Dr. Friedrich Teßmann.

 La Biblioteca provinziala mët implü ciamó fora na cerna fora de sües coleziuns; ara se trata de publicaziuns nöies dl ann 2017 dal raiun todësch. Chëstes pîta n'impresciun generala dl'oferta atuala dër ampla fora di ciamps "Storia dla cultura", "Sozieté" y "Leteratöra".

Cherié le dagní

Che sunse pa? Co se comportunse ti confrunc dla migraziun, di dërc dles porsones y dles iniustizies soziales? Co dessel pa gní mosoré tl dagní le bëgnester y le svilup sozial? Co y ciodí se müda pa le clima y cara é pa la funziun dla porsona te chësc prozes? Chëstes y cotan d'atres chestiuns vëgn en chësc ann alzades fora te publicaziuns sön le tema de co cherié le dagní ("Zukunft gestalten").

Foradechël vëgn en chësc ann le de dla leteratöra dediché al tema dl passé dla felizité "Die Flüchtigkeit des Glücks". Al gnará tigní ai 27 de jená 2018 tl Waltherhaus.

Orars de daurida

Mostra di libri “Bücherwelten”: Ciasa dla cultura Walther von der Vogelweide, Schlernstraße 1, Balsan
Daurida ai 16.01.2018, dales 18:00
Orars: 17.01.2018 – 06.02.2018, dal lönesc ala sabeda 09:00 – 18:00

 

(USP)

(Atualisà ai: 28/04/2011)