Hauptinhalt

Comunicać dal Ufize Stampa dla Provinzia

Scora / Cultura | 23.02.2018 | 17:55

Lena Mulser presidënta dla Consulta di Jogn - Sentada deboriada

La Consulta di Jogn provinziala é formada dales Consultes di Jogn ladina, todëscia y taliana. Les trëi Consultes s’á incunté incö por le pröm iade a Balsan.

Pröma sentada deboriada dles trëi Consultes di Jogn ladina, todëscia y taliana (Foto: USP/rc)Pröma sentada deboriada dles trëi Consultes di Jogn ladina, todëscia y taliana (Foto: USP/rc)

La Junta provinziala á nominé tles edemes da denant les trëi Consultes di Jogn por i grups linguistics ladin, todësch y talian por la perioda 2018 – 2020. Indöt él 36 comëmbri che fej pert dla Consulta di Jogn provinziala che s’á incunté incö ai 23 de forá por le prom iade adöm ai trëi assessurs por la pröma sentada deboriada. Por ci che reverda la Consulta di Jogn ladina él gnü lité la presidënta nöia che é Lena Mulser da Urtijëi che á sotligné da orëi renforzé la colaboraziun danter les trëi realtés linguistiches y da laoré inant sön prisc azessibli por l’abité por i jogn. Por ci che reverda la Consulta di Jogn taliana é la suranstanta nöia Adelina Perlaska, da pert todëscia él Verena Mittelberger.

Un di fins prinzipai dl’incuntada é sté chël da imparé da se conësce danter i rapresentanc por lauré fora punc de comunanza dles tematiches che reverda la jonëza. I assessurs por la jonëza Christian Tommasini y Philipp Achammer á sotligné che “la Consulta di Jogn provinziala á le compit prinzipal da porté inant les ghiranzes di jogn y da consulté la Junta provinziala tles tematiches che reverda i jogn”.

Por ci che reverda la Consulta di Jogn ladina á la Junta nominé 11 rapresentanc. Da pert dles assoziaziuns joniles dla Val Badia y de Gherdëna él gnü nominé Elvis Burchia (Badia), Erlacher Valentin (Mareo), Milena Kostner (Urtijëi), Felix Nagler (La Val), Alex Perathoner (Sëlva), Christian Pescoll (Urtijëi) y Carolin Pitscheider (Badia). Da pert di Sorvisc ai Jogn él gnü nominé sciöche espert Gabriel Stuffer da Urtijëi, da pert di Comuns Vito Campei (La Val) y Ivan Senoner (Sëlva). Por ci che reverda le Consëi scolastich provinzial él gnü nominé Lena Mulser.

Les Consultes di Jogn é formades da porsones jones y da porsones che se dá jö cun la jonëza, che vëgn nominades dales assoziaziuns di jogn y dai Comuns. Implü fejel ciamó pert dla Consulta n rapresentant / na rapresentanta dl Consëi Scolastich provinzial. Ajache les sentades deboriada á albü n gran suzes te chësta forma y ajache ares porta pro a arjunje i traverc, mantigniss les Consultes provinziales dla jonëza ion chësta forma de colaboraziun ince tl dagní.

 

 

 

(USP)

  1. Les trëi suranstantes nöies dles Consultes di jogn (d.m.c.): Lena Mulser, Verena Mittelberger y Adelina Perlaska (Foto: USP/Rc) [JPG 19 KB]

(Atualisà ai: 28/04/2011)