Hauptinhalt

Comunicać dal Ufize Stampa dla Provinzia

Scora / Cultura | 14.09.2018 | 12:05

Presentaziun dla VII ediziun dla Fiera dla Formaziun „Futurum“

Incö ai 14 de setëmber él gnü presenté le program dla Fiera dla Formaziun Futurum che gnará tignida dai 20 ai 22 de setëmber a Balsan.

La Fiera dla Formaziun "Futurum" é gnüda presentada incö ai 14 de setëmber a Balsan (Foto: USP)La Fiera dla Formaziun "Futurum" é gnüda presentada incö ai 14 de setëmber a Balsan (Foto: USP)

Ciafa tüa strada“: chësc é le moto dla setima ediziun dla Fiera dla Formaziun Futurum 2018 che gnará tignida dai 20 ai 22 de setëmber tla sënta dla Fiera da Balsan y che pita na suraodüda sön les propostes formatives dl monn dles scores altes y profescionales, dla formaziun profescionala, dles Universités tl Südtirol y tles vijinanzes sciöche ince dles profesciuns plü praticades tl Südtirol. Al gnará pité na suraodüda sön i percursc formatifs y profescionai dales scores altes inant cina ala formaziun universitara y permanënta sön le laur. La ediziun 2016 é gnüda vijitada da indöt 18.500 porsones.

Le program detaié dla Fiera é gnü presenté incö, ai 14 de setëmber, te na conferënza stampa. La Fiera dla Formaziun „Futurum“ é ponsada dantadöt por i scolars y les scolares dla scora mesana y alta, mo ince dles scores profescionales por s’informé sön les poscibilités desvalies che le monn dl’educaziun pita aldedaincö. Tratan la Fiera ti gnarál dé n’atenziun particolara ala scomenciadia MINT (vëndres, ai 21 de setëmber) che á sciöche obietif la promoziun dles materies tecniches y scientifiches sciöche la matematica, l’informatica, les sciënzes naturales y la tecnica. La scomenciada MINT gnará tignida por le pröm iade tl zënter NOI Techpark a Balsan. Na novité al intern dla scomenciadia MINT sará le format "Mitans y tecnica" por scolares dles cuintes classes dles scores mesanes che ciafará na suraodüda por ci che reverda les materies scientifiches y tecniches.

Na manifestaziun importanta tratan la fiera sará ince le campionat statal dles profesciuns „Worldskills Italy 2018“. Chësta finestra söl monn dl laur reverda de plü seturs dal’artejanat, al’agricoltöra, le turism cina ala gastronomia. Al sará ala pert 200 partezipanc y partezipantes che se mosorará te 30 mestiers desfarënc.

La novité da inann é la scomenciadia “JobInfo” che vëgn organisada dala Ciamena dl Comerz adöm ala Fiera da Balsan, tratan chëra che impreses dl Südtirol y daturs dl laur che presentëia sües ativités y descrii i detais di laurs. Al é n’ocajiun por i scolars y scolares da ciafé informaziuns diretes dai daturs de laur de pröma man.

La Fiera Futurum vëgn organisada dala Ofize Promoziun dl Stüde, Université y Inrescida Scientifica adöm cun i Departimënc dla scora todëscia, taliana y ladina, dai Ofizi Formaziun permanënta dla Cultura todëscia y taliana, dala Repartiziun Laur, sciöche ince dal LVH-APA, dala Ciamena dl Comerz y dala Fiera Balsan.

Por plü informaziuns: http://www.futurum.it

 

 

(USP)

(Atualisà ai: 28/04/2011)