Hauptinhalt

Comunicać dal Ufize Stampa dla Provinzia

Scora / Cultura | 07.01.2019 | 16:20

Reorganisaziun dl'Intendënza y Cultura ladina: Löm vërda dala Junta

La Junta á aprové dan da püch la reorganisaziun dl'Intendënza y Cultura ladina che prevëiga na spartiziun tlera di compic al intern dl’aministraziun scolastica.

Reorganisaziun dlReorganisaziun dl'Intendënza y Cultura ladina: organigram nü

Spartiziun di compic tlera, valorisaziun dla cultura ladina y adatamënt al sistem dla formaziun todëscia y taliana – chisc é i trëi punc zentrai dla reorganisaziun dl'Intendënza y Cultura ladina, che é gnüda aprovada dan da püch dala junta provinziala.

A ce dl sistem él la “Intendënza y Cultura ladina”. Sot chësta él la Repartiziun Aministraziun dla scora y cultura ladina y la Direziun provinziala Scolines y scores ladines. Le Sorvisc provinzial Evaluaziun dles scores ladines depënd dala Intendënza y cultura ladina y á na süa autonomia tla valutaziun dl sistem formatif. „Pro la reorganisaziun él gnü definí a na moda tlera che al é la medema porsona a ce dl'Intendënza y Cultura ladina y dla Direziun provinziala“, dij l'assessur provinzial ladin Florian Mussner. Cun la spartiziun nöia ón tigní cunt dles condiziuns dl monn dla scora che se müda y ti pité ales scolares, ai scolars y ales colaboradësses y colaboradus na strotöra efiziënta por sostigní le laur educatif a vigni livel, „Porchël él preodü tl organigram ince de plü referac che se dá jö cun ambic spezifics dl monn ladin dla scora y dla cultura“, spliga Mussner. La strotöra nöia prevëiga sëgn referac por la formaziun interculturala, por la supervijiun y le coaching, por la promoziun y l’educaziun ala sanité y ala mobilité, por le plurilinguism y la didatica, por la formaziun y l'ajornamënt, por i materiai didatics y i media nüs y por le sport scolastich, che en pert é bele sëgn pert dl sistem.

I compic dl'Intendënza y Cultura ladina vëgn definis tres l'organisaziun nöia che dá dant les indicaziuns cheder, fej fora i fins y les ativités en autonomia, mo colaborëia cun les direziuns por l’istruziun y la formaziun todëscia y taliana, renforza l'identité ladina tl contest plurilingual y sostëgn n cheder educatif global dla porsona. A chësta moda é l'Intendënza y Cultura ladina le punt de referimënt zentral por les chestiuns liades ala formaziun y ala cultura dl grup linguistich ladin.

La Direziun provinziala Scolines y scores ladines é responsabla de n'aministraziun omogena y se crüzia da garantí süa cualité. Ara se crüzia dles scolines, dles scores elementares, mesanes, altes y profescionales ladines dla provinzia. Implü röia ince le Ciamp pedagogich y le Zënter de competënza Inclujiun y Consulënza sot la Direziun provinziala. La direturia provinziala é tl medemo tëmp ince a ce dl'Intendënza y Cultura ladina.

Pro la Repartiziun Aministraziun dla scora y cultura ladina tochel la direziun dla repartiziun, l’Ofize Aministraziun scolastica (18.1) y l’Ofize Cultura ladina y Jonëza (18.2). L'Ofize Aministraziun scolastica á danterater de plü compic che reverda le personal insegnant y dirigënt, la gestiun y l’incadramënt dl personal insegnant, l’aministraziun di organics dla scolina y dla scora y le finanziamënt scolastich. L'Ofize Cultura ladina y Jonëza se dará jö danterater cun le sostëgn dl lingaz ladin, l'elaboraziun dles domandes de contribut dles uniuns culturales, la realisaziun de manifestaziuns culturales, la colaboraziun cun i departimënc responsabli dla cultura taliana y todëscia. Pro chësc Ofize toca ince le Sorvisc por la jonëza ladin. “La creaziun de n Ofize por la Cultura ladina y Jonëza é na gran arjunta por nosta mendranza”, spliga inant l’assessur Mussner.

(USP)

  1. Reorganisaziun dl’Intendënza y Cultura ladina: organigram nü [PDF 32 KB]

(Atualisà ai: 28/04/2011)