Hauptinhalt

Rujeneda & identità

La fusties de chësta rujenedes preromaniches ie ncueicundì mo da udëi tl lessich alpin, p.ej. barantl, brënta, crëp, dascia, nida, roa. Da auzé ora iel che la doi denonimazions ladin y retoroman ne se basea nia sun na rujeneda unica ma sun na cumpëida de idioms cun la medema carateristiches linguistiches. Chësta familia linguistica possen spartì su te trëi ijules: l Ladin dla Dolomites ntëur Mëisules, l retoroman ti Grijons, y l Furlan tl Friul.
Pra l ladin dla Dolomites iel chëi idioms che vën rujenei tla valedes ntëur Mëisules: badiot cun si trëi variantes: badiot dl Alta, ladin de mesaval y marou, gherdëina, fascian che vën spartì su te cazet, brach y moenat, fedom ulache on la varianta de Fedom y Col de Santa Lizia y ampezan, l idiom de Cortina. Chësc ultim idiom se desferenzieia mpue dai autri dal pont de ududa linguistich, purëmpò fejel pert dl ladin zentrel: dantaldut per rejons storich -culturels, per rejons de se sentì pert de na grupa linguistica y per l liam ideologich-culturel.
Sun la creazion dl lingaz unificà iel unì rujenà truep. L prof. Schmid ie unì nciarià dai doi istituc culturei Micurà de Rü y Majon di Fascegn à lauré ora criteres per na koiné. Chësc lingaz unificà ie te n prim mumënt unì batejà Ladin Dolomitan, plu tert ti àn dat l inuem Ladin standard. L ladin unificà se basea sun la cumparazion di idioms singuli, l ie unì cris ora la carateristiches coletives o chëla varianta che vën dant l plu suvënz. L ti ie unì dat na cërta preferënza ala formes plu antiches y conservatives. Per cie che reverda l’azetanza y la metuda n pratiga dl lingaz unificà ie la minonghes scialdi desvalives: cërc vëigh l ladin standard sciche l’unica puscibltà acioche l ladin possa sëuraviver, autri l vëigh sciche n lingaz artifiziel che i ne sënt nia sia. Do truepa descuscions iel unit tëut la dezijion de ne recunëscer nia l ladin standard ufizialmënter, i lingac aministratifs tla provinzia de Bulsan ie donca i idioms de Gherdëina y dla Val Badia.

Leteratura cunsieda:
Forni, Marco. Ladinische Einblicke. Erzählte Vergangenheit, erlebte Gegenwart in den ladinischen Dolomitentälern. Istitut Ladin Micurà de Rü, 2005.
Belardi, Walter. Breve storia della lingua e letteratura ladina. Istitut Cultural Ladin “Micurà de Rü” 1995.

(Atualisà ai: 23/12/2008)